《回到家鄉的第3日》
返意大利短短4個鐘嘅機程，最令我哋擔憂嘅事情真的發生了~ 意佬發燒 ！~ 😳😱😖
今時今日，最「污穢」最得人驚嘅莫過於機場同飛機艙，我哋已經戴哂口罩、手套，每個check point 都用濕紙巾由頭抹到落腳趾尾，平時唔捨得upgrade 張機票，今次都忍痛買商務位兼全程唔食嘢唔去廁所......莫非真係好事多磨，好哋哋喺埃及冇事，係要坐程飛機返屋企而中招？😖
意佬燒到38.3度！佢問我究竟我哋係咪做錯咗決定，應該留喺埃及？又問我佢係咪會死喺屋企......俾啲咁難答嘅問題，嚇到我唔知點樣算，突然驚惶失措，但不斷同自己講要撐住唔可以流馬尿，安慰佢可能咳得太耐又啱啱搭完凌晨機兼且個人精神太緊張，所以先發燒。
後來意佬靈機一觸打俾智囊團，佢嘅醫生朋友呢排都做咗前線勇士，所以好了解有關武肺嘅東東。佢話：
1) 意大利依家已經冇哂武肺嘅即時檢測試劑，如果你報稱懷疑中招，就只有驗要等36小時嗰隻，成個倉大把人排住驗，36小時內佢哋唔會放你走，被迫同一堆唔知有冇病嘅人困足日半，分分鐘冇事都變有事。
2) 如果你打118緊急熱線，醫療隊上門後知道你唔嚴重，冇呼吸困難，就只會未來一星期上嚟繼續幫你量體溫係咁多，叫做芒住你個情況。咁你咁大個人，都寧願自己量都好過日日有人入屋幫你量，然後你又要消毒一大輪，仲麻煩。
3) 醫生朋友進一步確定意佬係胃酸問題同太緊張而咳，話如果佢真係武肺咳，唔會咳足一個月都生out out喺度。
4) 最後醫生教意佬食一隻喺意大利家傳戶曉嘅退燒藥，話食咗佢如果退燒就係普通燒，如果豪無反應呢咁9成都中咗㗎喇！
意佬食過退燒藥後，將支電子探熱針不斷輪流放喺左右格拉底，量咗不下50次，支針係咁咇咇聲響，響到我心都煩。乜都幫唔到，唯有煮個洋蔥蕃茄西椒忟雞翼，啲雞全部都冇毛有翼絕對有助抗疫，放埋成個洋蔥落去幫助殺菌同發汗，希望意佬病都食得好啲啦～嗚嗚…
喺我嘅抗炎雞翼同退燒藥雙管齊下，經過半日反反覆覆升吓跌吓咁，今晚總算叫做退咗燒😌
#意大利隔離實錄
#發燒點樣算
#食抗炎雞翼
#壓力過山車
#唔可以掉以輕心
#仲未過潛伏期
#iorestoacasa
Search